Puntegiadura e ortografia. Sa pelea de s’Apostrophe Protection Society in Uk

S’inglesu est sa limba dominante in custu mundu. Est cosa chi giai ischimus. Ma a l’ischìamus chi gente meda impreat male sos apòstrofos? 

S’impreu no est difìtzile. “It's”, pro nàrrere, est sa contratzione de “it is” e de “it has”. E a s’imbesse “hasn’t” cheret nàrrere “has not”, chi “no at”. Gasi etotu s’apòstrofu cheret postu pro inditare sos raportos de possessu o de apartenèntzia (“John's car” → “The car of John”). E puru b’at chie si lu faddit, comente sos chi lu ponent in intro de su pronùmene personale possessivu “its”. 

Non gente comune ebbia ma finamentas impresas e giornales. Su Daily Mirror, in un’artìculu chi annuntziaiat sa serrada de unu grandu nùmeru de butegas de una cadena, iscrieit «See if you’re local is on the list». If you are? 

Pro custu, dae su 2001, est nàschida s’Apostrophe Protection Society. Sa missione sua, mancu a lu nàrrere, est sa de «preservare s’impreu curretu de custu importante, ma abusadu, elementu de puntegiadura». A concruos de su 2019 s’Aps sesseit de traballare. Ma como sos curretores de s’assòtziu, ghiados dae su presidente nou Bob McCalden, sunt torra in atividade. Cosa chi nos faghet a cumprèndere cantu s’apòstrofu siat galu “misused”. 

In su situ issoro b’at fintzas una rassigna de faddinas. Ma pro ite b’at un’assòtziu in difesa de s’apòstrofu, sende chi b’at chie si faddit fintzas sas vìrgulas e chie ponet àteros puntos a sa grussera (tipu s’esclamativu)? Ca a bisu de McCalden s’apòstrofu no est puntegiadura ebbia ma «mescamente ortografia». 

Nois, iscriende in sardu, diamus pòdere fàghere pagas faddinas in contu de apòstrofos. Forsis sa prus manna est sa de iscrìere s’artìculu indeterminativu maschile a s’italiana: est a nàrrere “un òmine” imbetzes de “un’òmine”. Ca in sardu sos artìculos sunt “unu” e “una” ebbia. Duncas a mala gana chi bi cheret s'apòstrofu in fatu de "un". 

Forsis in Sardigna bi diat chèrrere s’assòtziu de tutela de s’atzentu. Ma forsis nemmancu, ca a concruos de totu est mègius a b’àere prus esèmpios bonos (e passèntzia) chi non pinnas rujas (e grammar-nazi).