21 de freàrgiu: Die de sa limba materna. Punnemus a su coro!

Oe est sa Die internatzionale de sa limba materna. S’Unesco l’istitueit su 1999 cun sa punna de promòvere sa diversidade linguìstica e culturale e su multilinguismu. 

E totu cantos nois la tzelebramus ammentende sas acontèssidas de su 1952. In die de oe sa politzia de su chi tando fiat su Pàkistan orientale (cando su Bangladesh non fiat galu indipendente) morgeit a bator istudiantes bengalesos de s’Universidade de Dacca. Fiant manifestende pro s’ufitzialidade de sa limba issoro discriminada. 

Ma su cuntzetu de limba materna est pretzisu a lu ligare fintzas a un’àtera persone chi at gherradu pro su pòpulu suo. Nelson Mandela naraiat chi «If you talk to a man in a language he understands, that goes to his head. If you talk to him in his language, that goes to his heart». A su coro devimus punnare, no a sa conca ebbia. 

De su restu sa limba est meda de prus de unu mèdiu de comunicatzione. Narant sos de s’Unesco chi «est su fundamentu matessi de s’umanidade nostra» e chi in intro suo bi sunt «sos valores, sas cunvintziones e s’identidade» de unu pòpulu. 

Sos tempos de oe imponent una defensa de sas limbas maternas in cada parte de su praneta. Cada duas chidas nde morit una. E morende·si·nche si nche morit una parte de s’istòria umana. A nois in Sardigna tocat de fàghere sa parte nostra: punnende a su coro de sos sardos de oe e a su de sos de cras.